تورم القدم وزياده المياه تحت الجلد !!

وهنا لما بنتكلم عن تورم القدم بنقصد بيه التورم اللي بيصيب القدمين مع بعض (مش اللي ممكن يحصل في ناحيه واحده بس نتيجه كدمه مثلا )

## طيب هو انا ازي اعرف انه في تورم في رجلي ؟؟!!
في الاغلب التورم اللي بنتكلم عنه ده بيكون بادئ من وش القدم ، ويزيد بالتدريج من تحت لفوق لحد ما يوصل للركبه مرورا بالساق ،  وفي بعض الحلات بيوصل للفخد ثم البطن 
وعشان نتاكد انه تورم فعلا ، بنضغط علي وش القدم بصباع الابهام لثواني ، هنلاقي  اثر الصباع موجود في صوره حفره .

## طيب ايه اللي يعمل التورم ده ؟؟!!
اسباب كتير!!
في منها الطبيعي اللي مش بنقلق منه ولا بنحتاج ندي ليه علاج زي التورم اللي بيحصل في اواخر شهور((( الحمل )))
وفي منه اللي بيكون نتيجه امراض مزمنه زي مرضي((( ضعف عضله القلب ))) و مرضي((( الفشل الكلوي )))

واللي يهمنا النهارده هو التورم الاشهر والاهم  واللي اغلب الناس بتيجي تشتكي منه، وهو التورم الناتج عن((( ضعف عضله القلب))) .

زي ما احنا عارفين ان القلب هو مضخه الدم في الجسم ، واللي مهمته انه  يحرك الدم في الجسم دون توقف ابدا .

وفي حاله ان عضله القلب بدات تقل كفائتها عن الطبيعي (هنتكلم عن اسباب ضعف كفائه القلب في رساله لوحدها) هيبدا تراكم الدم (السوائل) في ابعد الامكان عن القلب واكترها تعرض للجاذبيه وهي (((القدم)))

##طيب ايه المشكله لما تكوني رجلي متورمه ، مدام انا بتحرك كويس وما فيش وجع فيها ،  ايه اللي هيخاليني اطلب المساعده الطبيه عشان اشيل التورم ده؟؟!!
وهنا تبدا المشكله اللي ديما بنواجهها مع مرضي ضعف عضله القلب ، وهو سوا فهم مرضه وعدم تقدير حجم المشكله 
  
 تورم القدم الناتج عن ضعف عضله القلب هو العرض الظاهري اللي بنقدر من خلاله نقيم وضع المريض ، بس للاسف مش القدم بس هي اللي بتتاثر ، اغلب اعضاء الجسم بتتاثر بتراكم السوائل فيها ، وهنا بنتكلم عن المكان رقم ٢ بعد القدم في تجمع السوائل وهي (((الرئه))) ، واللي لما بتتراكم فيها السوائل بتكون السبب الاشهر لطلب المريض للمساعده الطبيه في اسرع وقت ممكن .

 وهنا بيبدا المريض يشتكي من نهجان وصعوبه في التنفس واللي من الصعب التعايش معاهم ابدا ، بس للاسف بيكون المريض متاخر شويه .

عشان كده بناكد علي مرضي ضعف عضله القلب انه ما يستناش لحد ما يبدا ينهج ويزيد عليه تراكم السوائل في الجسم ، وانه لازم يزور الطبيب فورا في حاله تورم القدم كاعلامه ظاهريه علي تراكم السوائل في الجسم من الداخل .

دمتم سالمين معافين باذن الله 
د/محمود عياد 🩺🩺
(اخصائي القلب والاوعيه الدمويه والقسطره القلبيه)